Trondheim: Jonsvannsveien 46, første etasje.

Illustrasjonen under var ein del av saksdokumenta under rettssaka.

Bruken av dei ulike romma hadde endra seg da denne skissa vart laga.

I.
Da Sonderabteilung Lola tok i bruk Jonsvannsveien 46 som hovudkvarter i slutten av september 1943, flytta Solveig Kleve inn i det som hadde vore spisestua i huset til Ralph Tambs Lyche og familien hans. Døra inn til peisestua vart kledd igjen, men berre med ein uisolert lettvegg.

Ved månadsskiftet februar-mars flytta Solveig Kleve ut av huset. Henry Rinnan sjøl fekk da kontor i rommet og døra vart igjen opna.

II.
Peisestua fungerte som kontoret til Henry Rinnan det meste av tida. Det var gjerne her forhør starta, ofte med lettare mishandling før offeret vart frakta ned i kjellaren til meir brutal tortur.

Etter at Rinnan tok over spisestua, vart peisestua «forværelset» som vart delt av Solveig Kleve og nestkommanderande Karl Dolmen. Ivar Grande hadde kontorplass her den siste tida før han i august-september 1944 vart sparka frå jobben som nestkommanderande, men i utgangspunktet helsdt han til i rom V.

Det parodiske «rettsmøtet» som gav Bjørn Bjørnebo dødsdom, vart halde i peisestua.

III.
Frå entreen gjekk trappa opp til andre etasje, der det stort sett berre var loftsbuer. Unntaket var eit lite, sørvendt rom med skråtak. Brorparten av det første året var dette basen til telegrafisten Osvald Lyngstad som i periodar også budde i huset. Det er usikkert kva tid radiosendaren vart flytta ned i første etasje, men det var gjennomført i september 1944. Da hadde Rinnan eit møte med Randi Ruø i loftsrommet.

IV.
Kvar morgon møtte dei tilsette i Sonderabteilung Lola opp i vaktrommet for å få beskjed om dagens arbeidsoppgåver.

V.
I førstninga hadde Ivar Grande kontor i det som seinare vart telegrafrom.

VI.
I slutten av september 1943 flytta den snart åtte år gamle Anne-Marie Kleve inn i «pikeværelset» (hushjelpkammerset) i Jonsvannsveien 46. Mora Solveig (som var kontordame for Rinnan) budde i det som hadde vore spisestua (rom I). I luftline var det ikkje stort meir enn tre meter til kjellarrommet der den verste torturen vart gjennomført. Anne-Marie budde i huset i litt meir enn eitt år.

VII.
I den vesle gangen mellom pikeværelset og kjøkkenet var det ei bakdør og ei dør til kjellartrappa.

VIII.
Kjøkkenet vart brukt privat av Solveig Kleve som hadde husleiga inkludert i lønna si, men ikkje kosten. Det hendte at ho laga mat til Rinnan når han var i huset, men dei tilsette hadde med seg matpakke og fekk vanligvis ikkje mat i huset. Fangane var sjelden så lenge i huset at det var aktuelt med måltider, men det hendte at Solveig Kleve stakk til dei noko av sitt eige.